Монгол Улсын Хүний эрхийн Үндэсний Комисс нь үйл ажиллагаагаа Стратеги төлөвлөгөөнд үндэслэн явуулдаг. Комиссын ажлын гол чиглэлүүдийн хэтийн төлөв, хүрэх үр дүнг тодорхойлох стратеги төлөвлөгөөг гурван жилд нэг удаа шинэчлэн баталдаг юм.  Энэ жил буюу 2012 оны 2 дугаар сард Комисс шинэ стратеги төлөвлөгөөгөө боловсруулан баталлаа. Төлөвлөгөөг шинэчлэхтэй уялдуулан Комисс эрхэм зорилго, уриагаа шинэчилсэн бөгөөд манай эрхэм зорилго нь “Хүний эрх, эрх чөлөөг хүндэтгэх, хамгаалах, хөхиүлэн дэмжих үйлсийг манлайлах” явдал юм.  Харин цаашид “Хүний эрх, эрх чөлөөг орон даяар, цаг ямагт, хүн бүрт” гэсэн уриатайгаар ажиллах болно.

Монгол Улсын Хүний эрхийн Үндэсний Комисс нь байгуулагдсан цагаасаа “Хүний эрхийн нээлттэй өдөр” арга хэмжээг Монгол Улсын 21 аймаг, зарим сумдад зохион байгуулж  ирсэн юм. Энэ жилийн “Хүний эрхийн нээлттэй өдөр” арга хэмжээг Говьсүмбэр, Дорноговь аймгуудаас эхлэн зохион байгуулахаар боллоо.

Хүний эрхийн Үндэсний Комиссын дарга Ж.Бямбадоржоор ахлуулсан баг бүрэлдэхүүн Говьсүмбэр аймгийн Сүмбэр суманд  2012 оны 3 дугаар сарын 26,  Дорноговь аймгийн Сайншанд суманд  3 дугаар сарын 27, Замын-Үүд суманд 3 дугаар сарын 28, 29-ний өдрүүдэд ажиллахаар аян замдаа бэлтгээд байна.   

Монгол Улсын Хүний эрхийн Үндэсний Комисс нь НҮБ-ын Хөгжлийн хөтөлбөртэй хамтран хэрэгжүүлж буй “Хүний эрхийн хэрэгжилтэд хяналт тавих үндэсний чадавхийг бэхжүүлэх нь” төслийн хүрээнд “Монгол Улс дахь уул уурхайн салбар ба хүний эрх” сэдэвт хяналт шалгалтын ажлын судалгаа, мэдээллийн зарим чиг үүргийг хариуцан гүйцэтгэх судалгааны багийг сонгон шалгаруулж хамтран ажиллана.

Хүний Эрхийн Үндэсний Комисс 2012 оны гуравдугаар сарын 12, 13-нд Сэтгэцийн эрүүл мэндийн үндэсний төвийн ажилтан, албан хаагчдад зориулан хүний эрхийн сургалтыг амжилттай зохион байгуулав. 

Хүний эрхийн Үндэсний Комисс, Нээлттэй нийгэм форум хамтран Монгол улсад хүний эрхийн онолын ойлголтыг хөгжүүлж буй хүний эрхийн мэргэжилтэн, судлаачдын эрдэм шинжилгээний болон практик ажлын үр дүнг олон нийтэд түгээн дэлгэрүүлэх зорилгоор хүний эрхийн цуврал илтгэл, хэлэлцүүлгийг зохион байгуулж байна.

Хүний эрхийн асуудлаарх цуврал илтгэлийн анхны илтгэлийг Улсын их хурлын гишүүн, Хүний эрхийн дэд хорооны дарга Х.Тэмүүжин “Парламентын хяналт ба Хүний эрх” сэдвээр уншина.

Илтгэл, хэлэлцүүлэг 2012 оны 3 дугаар сарын 21-ний Лхагва гаригийн 15 цагт Нээлттэй нийгэм форумын хурлын танхимд болно. 

Холбоо барих утас: 262902, 313207

Хөтөлбөр

15:00 – 15:15 Нээлт

Ж.Дашдорж, ХЭҮК-ийн гишүүн

П.Эрдэнэжаргал, ННФ-ын Гүйцэтгэх захирал

15:15 – 15:20 Илтгэгчийн танилцуулга

ННФ-ын менежер П.Бадамрагчаа

15:20 – 15:50 “Парламентийн хяналт ба Хүний эрх” илтгэл

Х.Тэмүүжин, УИХ-ын гишүүн,

Хүний эрхийн дэд хорооны дарга

15:50 – 16:10 Асуулт хариулт

16:10 – 16:40 Хэлэлцүүлэг

16:40 – 16:50 Хаалт

Төрийн байгууллагад төрийн жинхэнэ албан хаагчаар ажиллаж байгаа болон удирдах ажилтны сонгон шалгаруулалтад тэнцэж нөөцөд бүртгэгдсэн иргэдээс Хүний эрхийн Үндэсний Комиссын Ажлын албанд Захиргаа хамтын ажиллагааны хэлтсийн даргын албан тушаалд сонгон шалгаруулж  авна.

Улаанбаатар – 38,                                                                Утас: 262902 

Тусгаар Тогтнолын талбай                                                   Факс: 976-51-262786

Засгийн газрын XI байр, 509 тоот                                         Цахим шуудан: info@mn-nhrc.org

                                                                                             Цахим хаяг: www.mn-nhrc.org                                                                                                                             

              МОНГОЛ УЛСЫН ХҮНИЙ ЭРХИЙН ҮНДЭСНИЙ КОМИСС 

                                                                                                                                 2011 оны 01 дүгээр сарын 06.

МЭДЭГДЭЛ

Иргэний болон улс төрийн эрхийн тухай олон улсын Пактын хоёрдугаар нэмэлт  протоколд нэгдэн орох тухай хуулийг Монгол Улсын Их Хурал 2012 оны 1 дүгээр сарын 05-ны өдөр баталж, Монгол Улс цаазаар авах ялгүй орон болсныг түмэн олноо сонордуулан мэдэгдэхэд таатай байна.

Цаазаар авах ялыг гүйцэтгэхийг  түдгэлзүүлэх шийдвэрийг анх удаа гаргаж, хүний эрхийн төрийн болон төрийн бус байгууллагын санал санаачлагыг дэмжиж, нөр их хүчин чармайлт тавьж  ирсэн Монгол Улсын Ерөнхийлөгч Цахиагийн Элбэгдорж, НҮБ-ын Эрүүдэн шүүхийн эсрэг хорооноос Монгол Улсын Засгийн газарт өгсөн болон олон улсын байгууллагуудаас удаа дараа гаргасан зөвлөмжийг  биелүүлж, нэмэлт протоколд нэгдэн орох хуулийг Засгийн газрын өргөн мэдүүлснээр баталсан  Улсын Их Хурлын дарга, гишүүдэд  Хүний эрхийн Үндэсний Комиссоос талархал илэрхийлж байна.

Арга хэмжээний талаарх дэлгэрэнгүй мэдээллийг ХЭҮК-ын Хэвлэл мэдээлэл хариуцсан референт З.Бадмаарагаас авна уу. (Цахим шуудан: z.badmaarag@mn-nhrc.org; Утас 262902)

НҮБ-ын 1982 оны XVI чуулганаар “...гишүүн орнууд...хамгийн ноцтой гэмт хэрэгт ч цаазаар авах ял шийтгэлийг хязгаарлах ёстой” гэсэн зөвлөмжийг гаргасан байдаг.