Хүний эрхийн Түгээмэл Тунхаглалыг баталсан 12 дугаар сарын 10-ны өдрийг “Хүний эрхийн олон улсын өдөр” болгон тунхаглан зарласнаар жил бүрийн энэ өдөрт зориулан Нэгдсэн Үндэстний Байгууллагын Хүний эрхийн Дээд Комиссарын Газраас гаргадаг уриалгын хүрээнд дэлхийн өнцөг булан бүрт тэмдэглэн өнгөрүүлдэг уламжлалтай билээ. “Хүний эрх-365” уриан дор тэмдэглэх энэхүү өдрийг бүтэн жилийн туршид өдөр бүр хүний эрх, эрх чөлөөг хүндэтгэх, хамгаалах, хөхиүлэн дэмжих уриалгыг дэлхий нийтэд хандаж гарсан нь “Хүний эрх, эрх чөлөөг орон даяар, цаг ямагт” гэсэн алсын хараатай үйл ажиллагаа явуулдаг манай байгууллагын зорилготой яв цав тохирч байгаад туйлын баяртай байна.
Түүнчлэн энэ жил Эрүүдэн шүүх болон бусад хэлбэрээр хэрцгий, хүнлэг бусаар буюу хүний нэр төрийг доромжлон, харьцаж шийтгэхийн эсрэг конвенц батлагдсаны 30 жилийн ой, Хүүхдийн эрхийн тухай конвенц батлагдсаны 25 жилийн ой давхар тохиож байгаа нь ихээхэн онцлогтой юм.
Хүн бүрт эрх, эрх чөлөөг баталгаатай эдлүүлэх нь Монгол хүний хөгжлийг хангах үндэс, ардчилалын гол агуулга болдог учраас энэхүү ариун үйлсэд олон улсын байгууллага, манай орны төрийн бүх шатны байгууллага, албан тушаалтан, иргэний нийгмийн байгууллага, аж ахуйн нэгж, хүн бүхэн хамтран зүтгэж, амжилт олно гэдэгт Монгол Улсын Хүний эрхийн Үндэсний Комисс бүрэн итгэлтэй байна.
Монгол хүний сайн сайхны төлөөх буянтай үйлс бүхэн дэлгэрэх болтугай.
Монгол Улсын Хүний эрхийн
Үндэсний Комиссын дарга Ж.Бямбадорж